Tèks : VII-XI-XC
Nan peyi kote moun ap reflechi, kote moun trete moun tankou moun se timoun ki gen premye plas. Se ak timoun yo chanjman nan peyi sa yo kòmanse, nan tout branch ki nan sosyete a.
Se sa ki pouse peyi sa yo, ki gen moun ak tèt bay plas ak tout fanmi, fanmi akèy kote yon timoun ki òfelen, nenpòt jan sa ye, opòtinite entegre yon fanmi san kè sote.
Davans, timoun lan pran konfyans ke l pap sibi okenn diskriminasyon nan fanmi li antre a. Paske tretman yo menm, li jwenn tout lanmou li pat menm espere.
Poutan, nan peyi nou timoun yo prefere mennen yon vi kokorat olye yo rete kay madanm ak mesye. Yo pa manje byen, yo pa dòmi byen, yo pa janm byen abiye.
Timoun yo vinn parantifye, kote se yo k ap gade, pwoteje timoun menm laj ak yo. Pandan manman ak papa chita la sou fòtèy yo, ap pase lòd.
Se yo ki fè manje a bay drese, men yo toujou bliye retire pou yo. Se yo ankò ki pou mennen timoun menm laj ak yo lekòl nan kay la. Yo pye atè nan tout lari, madanm ap maltrete yo, legliz pa voye zye sou yo, se koze lajan yo ki enpòtan.
Bokit dlo y ap redi pote granmoun paka potel. Yo pagen dwa fè okenn okenn komantè nan fanmi an. Tout moun dòmi sou matla men pou yo natrès pap janm pase mòd, sapat trui, boyo se pou yo sa vann nan mache.
Dwa pale yo se di manje a kwit, baryè a frape wi matant, tonton dlo pouw benyen an pare, marenn voyem nan mache pandan y ap pran malonèt chen dèyèl.
Leta nou an menm ki deja rete ak moun pa wè Kòman, ni deside kòman sove lavi timoun sa yo.
Dim kote yon peyi ki pa bay timoun chans pou yo viv prale. Eske pagen yon kreyatè ki ekziste k ap gade jan ti pitit li yo ap soufri anba men mechan yo ?
Eske l ap rete san l pa janm di yon mo pou yo ?
Jodi a jenès la kanpe pou di non ak restavèk nan peyi a. Bay timoun yo yon chans pou yo prepare avni peyi a. Sispann toksike lespri yo ak move souvni, yo merite respè nou, yo se avni peyi a lonje lanmen ba yo.
Pagen moun san defo ak kalite, donk timoun yo se moun tankou tout moun. An nou sipòte yo, kore yo menm jan nou jwenn lòt moun fè sa pou nou pandan y ap sipòte nou ak defo epi bann respè pou kalite nou.
N ap rele aba fanmi otorirè, fanmi dezangaje, fanmi pèmisif sa yo. Nou fè apèl ak fanmi demokrat, fanmi ki sa yo ki konnen tout timoun se timoun, tout gen devwa ak dwa yo nan sosyete a.
Timoun ou neglije jodi a, se li ki pa p pè, ni neglije mete fen nan lavi w pita.
Aba restavèk an Ayiti !
Enspirasyon zero sèt, onz, katreven dis la mande yon chans pou timoun yo.
Ekriven : Brousseau Volcius
Aucun commentaire:
Publier un commentaire